110 / 336 
110
Сонымен... Айтпақшы, мен сіздермен әлі таныспаппын ғой.
Менің атым – Алмамбет. Бұл есім айдай әлемге әйгілі: айкөл
Манастың атақты досы, алтын айдар шоқ белбеу Алмамбетті
кім білмейді? Мен туғанда палуан атам лайықты есім таңдап,
ұзақ ойланыпты. Елден ерек ат іздеп, қалың-қалың қиссаларды
ақтарғанға ұқсайды. Содан не керек, ақыры былай депті: «Бұл
баламның батыр боларына сенемін. Қазақта неше сан батыр
өткен, солардың бәрі де бұған ата. Қайсысының құрметіне
атасам да осы жаманым жаман болмайды. Бірақ ертең келін-
кепшік, бала-шаға мұның атын атаған сайын, атасының атын
атайтыны қабырғама батады. Ал атақты Алмамбет батыр
бұған қан жағынан туыспайды. Бір деңіз. Екіншіден, нәсілі
басқа болғанмен, жасанған жаудан қайтпаған, күшіне ақылы
мен адамгершілігі сай, әділ батыр – менің ең жақсы көретін
батырларымның бірі. Соның құрметіне Алмамбет болсын
мұның аты!» Құлағыма зор дауысымен үш мәрте айқайлапты.
Сонымен мен Алмамбет Қарасаевпын. Иә, айтқандай, фами
лиямның Қарасаев болуы да қызық. Қазақта әкесінің аты
балаға фамилия болады ғой. Бірақ атам жуас әкемнің атын
Алмамбетпен қатар қойғысы келмепті. «Мен өз балаларымның
арқасында пәмилә болып көрдім. Сен де басқа балаларыңды өз
атыңа жаздырдың, – депті әкеме.– Ал атақты Қарасай батыр
атамызды біз неғып естен шығардық? Алмамбеттей балаға
бабамыздың аты лайық. Қашанда есінде болып, қасында
жүрсін, әрдайым аруағы қолдасын». Осыған бата қылып,
ЗАГС-ке келсе, онда отырған шөпжелкелер қырсыққан
көрінеді. «Әкесінің фамилиясы қалай болса, солай қалады»,
– дейді. Ондайға көнсе менің атам бола ма, айтыса кетеді.
«Шырақтарым, сол айтқан пәмиләләрің мына мен ғой. Оны
сендер емес, мен бергем. Мына баламды да қалаған атыма
жаздырамын. Ойбай-ау, қалмаққа жаздырсам да өз еркім ғой.
Ал сендер батыр атасының атын қимайсыңдар. Атасының
атына жазылуға болмайды деген не сұмдық?! Ондай қиқаңды
қойыңдар! Қарай гөр өздерін, қаршадай боп алып, менің
балама пәмилә бергілері келеді. Оларыңа көне алмаймын!
Немере менікі, қан менікі, сондықтан пәмилә беретін де мен.
Ата жолымен келсеңдер де, заң жолымен келсеңдер де менікі