4 / 324 
4
Еске алып аруақты аталарды,
Қазағым, елдік сәнің бүгін келді!
Біз бұны бірақ кештеу ұғыппыз ғой,
Өзіміз өзімізге қылыппыз ғой.
Ұмытып батыр өткен аталарды,
Ұялмай адамбыз деп жүріппіз ғой!
Парыз көп өтелмеген әлі бізде,
Қарызбыз елге жас пен кәріміз де.
Басқаның князьдарын хан көтеріп,
Адасып келіппіз ғой бәріміз де!
Сенгені адастырды сүйікті елді,
Тұндырып жүрегіне күйік-шерді.
Ел үшін қанын төккен батырлардан,
Сорғандар елдің қанын биік болды!
Жақсылық көп қой дәстүр-салтымызда,
Кім еңбек етсе туған халқымызға,
Соларды қадір тұтып, хан көтеріп,
Оралдық енді адамдық қалпымызға.
Қазақтың еске аламыз заңғарларын,
Осы ғой арнар әнім, жалғар әнім.
Тілеймін ендігі жас ұрпақтардың
Батырдың жолын алға жалғағанын!
Ер жігіт қызмет қып ұлы еліне,
Арнасын адамзатқа тілегін де.
Қолынан қабанбайлық келмегенмен,
Қабанбайы болсын де жүрегінде!
... Серікжан, сүйсінемін порымыңа,
Бар қазақ қолын соққан қарымыңа.
Інімнің бірі едің ғой жөні бөлек,
Арнайы жүрегімде орының да.
Ағаңнан құр бекерге шошыма көп,
Ал енді ақтарылып жосыла кет.